Sunnudagur 24. apríl 2011 - Páskadagur og fleira

Þessi páskadagur hefur verið kjaftfullur af vinnu.  Allur fyrriparturinn fór í að undirbúa fyrirlesturinn á þriðjudaginn og núna í kvöld hef ég verið að vinna að skýrslugerð vegna Landspítalarannsóknarinnar. Núna eru drög tilbúin.

Guddan hefur verið að gera það gott síðustu daga.

Í gærmorgun ákvað hún að skreppa ein fram í stofu meðan við Lauga vorum enn að vakna. Við heyrðum glögglega að dóttirin var eitthvað að bjástra þarna frammi en svo þagnaði allt.

"Það er grunsamlega hljótt í stofunni núna" sagði Lauga og ég ákvað að kíkja og sjá hvað væri í gangi.

Ég mætti Guddunni á ganginum og sú var heldur en ekki brúnaþung. "Ónei" sagði hún "Gí sulla, allt blautt!"  Á stofuborðinu blasti kassagítar dótturinnar við og þegar betur var að gáð var hann hálffullur af vatni. Auk þess hafði nokkrum eldhúsáhöldum (leikfangaeldhúsáhöldum) verið troðið ofan í kassann og þarna flutu þau um. 

Hvernig hafði þetta eiginlega gerst? Jú, sú stutta hafði, þegar hún skrapp fram, tekið með sér vatnsbrúsann sem hún hefur inn í svefnherbergi á nóttunni en hún á það til að vilja fá að drekka um miðjar nætur. Brúsinn hafði sumsé verið tæmdur ofan í gítarinn.

---

Í morgun var mikil gleði þegar GHPL tók upp sitt fyrsta páskaegg. Reyndar voru páskaeggin tvö ... annað frá ömmu og afa á Sauðárkróki og hitt, sem var óhefðbundara egg á íslenskan mælikvarða, frá Huldu frænku. Mæltust bæði eggin ákaflega vel fyrir.

Svo var málshátturinn að sjálfsögðu lesinn ... "margur gjörir verr en hann veit" ...

Eftir dálítið bardús við páskaeggið, þar sem hvert gúmmilaðið á eftir öðru var rifið fram, rýndi GHPL inn um gatið á súkkulaðipáskaegginu og hélt því fram statt og stöðugt að inni í egginu væri nótt.

Í sjálfu sér áhugaverð pæling ...

---

Í kvöld fórum við svo í afmælisboð til Sverris ... annað matarboðið hjá þeim hjónum á þremur dögum ... geri aðrir betur!!