Yfirlit yfir næstu daga

Það er óhætt að það séu spennandi tímar framundan hjá Múrenunni og spúsunni. 

Fyrir liggur að fara suður til Melbourne næstu helgi og vera þar laugardag, sunnudag og mánudag. 

Planið er þannig að Múrenan og spúsan taka næturlestina til Melbourne á föstudagskvöldið og munu því mæta úthvíld til leiks á laugardaginn.  Á laugardeginum verður borgin skoðuð hátt og lágt, og til að mínúta fari ekki til spillis, keypti spúsan bók um Melbourne í dag.  Á næstu dögum verður rýnt í hana til að átta sig á því hvað skemmtilegast er að sjá og gera.

Um kvöldið munu Múrenan og spúsan svo gista hjá móðursystur Crightons, sem á einmitt heima í Melbourne.  Hversu heppilegt er það nú eiginlega?

Á sunnudagsmorgninum verður, eins og áður hefur verið tilkynnt um á þessari síðu, stefnan sett á Albert Park í þeim tilgangi að horfa á 2008 Formula 1 ING Australian Grand Prix.  Deginum verður sjálfsagt varið í að glápa á kappaksturinn og eitthvað honum viðkomandi (Múrenan hefur ekki hugmynd um hvernig á eiginlega að horfa á kappakstur ... en jæja ... ), en hápunktur dagsins og ferðarinnar verður um kvöldið þegar KISS stígur á stokk.
Einhvern tímann eftir tónleikanna verður svo aftur farið að sofa, en í þetta skiptið verður það á einhverju forkunnarfögru hóteli.

Mánudagurinn verður notaður til frekari skoðunarferða, alveg þangað til næturlestin til Sydney sígur af stað um kl. 19.30 það kvöld.  Um 11 klukkustundum síðar mun hún renna í hlað á aðaljárnbrautarstöðinni í Sydney.

Þá tekur við undirbúningur á næstu tónleikum sem verða í Acer Arena í Sydney á fimmtudagskvöldið, það kemur sjálfsagt engum á óvart að þeir tónleikar eru líka með KISS!!  G.J. móðir Múrenunnar á einmitt afmæli þennan dag og Múrenan veit varla um betri leið til að fagna þeim áfanga, sérstaklega vegna þess að afmælisbarnið er 16.000 km í burtu!!

En allavegana stefna næstu dagar í að verða "Rock and roll all nite, and party every day"!!!

Athugasemdir

[Stjóri (IP-tala skráð) 13.3.2008 kl. 03:52]

Ekki vissi ég að Múrenan hefði áhuga á Kiss   Þetta verður örugglega frábært og vonandi verða Kissararnir í jafngóðum gír og í Reiðhöllinni 1988...fyrir 20 árum síðan!! Byrjuðu þeir ekki annars á fæðingarári Múrenunnar? Ótrúlegir rokkhundar.

Formúlan er víst heilmikið upplifelsi. Frændi minn fór eitt sinn með vini sínum til Spánar á slíka keppni. Við innganginn að keppnissvæðinu ráku félagarnir augun í sölubás þar sem seldir voru eyrnatappar. Þegar vinurinn sagðist ætla að kaupa sér eyrnatappa hló frændi að honum og sagðist ekki vilja neina helv.... tappa í eyrun, hann vildi sko fá þetta alltsaman beint í æð! Þeir sátu á besta stað, nálægt brautinni og þar sem bílarnir ná mestum hraða. Á fyrsta hring leit frændi með skelfingarsvip á vin sinn og benti á eyrun á sér. Vinurinn brosti, rétti honum tvo eyrnatappa og sagði: Ég hef farið áður á formúlu!

Þannig að...ekki gleyma eyrnatöppunum!

[Páll Jakob Líndal, 13.3.2008 kl. 09:20]

Múrenan þakkar Stjóra fyrir góð ráð ... reyndar er búið að pakka eyrnatöppunum, en það var ekki vegna formúlunnar heldur vegna tónleikanna.  Eftir KISS-tónleikana í Hartford, CT fyrir tæpum 5 árum, hét Múrenan því að fara ekki aftur á KISS-tónleika án eyrnatappa.  Það tók hálft ár að koma eyrunum í rétt horf á nýjan leik eftir þá skemmtun!!

[Stjóri (IP-tala skráð) 13.3.2008 kl. 20:38]

Flott er, þetta verður vika eyrnatappanna:)