Mánudagur 13. ágúst 2012 - Nafni byrjar í leikskóla

Það hefur náttúrulega heilmikið gerst á öllum vígstöðvum síðan ég sat í sumarnóttinni á Hörgslandi á Síðu og skrifaði blogg.

Þá hafði ég fest kaup á 3G lykli til að geta tengst inn á internetið hvar og hvenær sem væri ... í það minnsta var manni talin trú um slíkt. Annað kom þó á daginn, því annað eins dótarí hef ég varla komist í tæri við.

Bloggið lagðist því útaf ...

... en nú er ég kominn aftur til Uppsala ... og við fjórmenningarnir komnir á mjög fínan stað eftir að hafa sagt "uppáhalds-leigusalanum okkar" upp. Kannski meira um það síðar en ...

... í dag hófst alvaran fyrir alvöru.

Hann alnafni minn fór nefnilega í leikskólann í fyrsta sinn. 

Í upphafi dags og með mikið fylgdarlið. 

Eftir því sem fréttir herma, gekk fyrsti skóladagur ævinnar nokkuð vel. Stubburinn lék við hvurn sinn fingur og að eina sem skyggði á gleðina var að hann fékk ekki að fara út að leika sér, heldur þurfti þess í stað að fást við kollega sinn sem var afar frekur til fjörsins.

 

Guðrún fór líka í fyrsta skipti á leikskólann í dag eftir sumarfrí, núna er hún komin á deildina sem hýsir elstu börnin ... hvorki meira né minna. Mér kæmi ekki á óvart ef hlutirnir færu að gerast núna en hún var í það minnsta afar sátt við daginn.

Í lok dagsins þegar systkinin hittust aftur hljóp bróðirinn skælbrosandi með opinn faðminn í átt til systur sinnar og þau föðmuðust mjög innilega að sögn sjónarvotta. 

Systkinin í stuði á skólalóðinni eftir annasaman dag. 

Læt þetta duga sem fyrsta blogg eftir sumarfrí. 

Athugasemdir

[Stjóri (IP-tala skráð) 15.8.2012 kl. 02:06]

Loksins kom ný færsla!:) Gaman að sjá að alvara lífsins byrjar vel hjá þeim litlu ... og til hamingju með nýja heimilið!  

[Páll Jakob Líndal, 16.8.2012 kl. 09:05]

Já, loksins, loksins ... núna byrjar fjörið :)