Sunnudagur 29. nóvember 2009

Í dag var brotið blað ... í dag var nefnilega jólasveinadagur ...

Íslendingafélagið boðaði til jólasveinaleitar í Stadsskogen.  Þar var leitað að Bjúgnakræki og Gáttaþef, sem voru mættir frá Íslandi og villtust í skóginum.

Eftir jólasveinaleitina var einhver "kúltiveraðasta" flugeldasýning sem ég hef upplifað.  Þar var listræni þátturinn látinn skipta meira máli en magnið ... m.ö.o. áhersla á gæði frekar en magn ...

Leikin var tónlist og flugeldum skotið upp í samræmi við tónlistina ... mjög flott!!

Eftir þessi herlegheit var svo haldið heim á leið og þaðan í innanhúsbolta ... sem var hreint ágætur ...

---

Niðurstaða dagsins hjá okkur Laugu var svo sú að hafa ávallt í huga tvennt:

1.  Ná hámarks lífsgæðum á hverjum degi ... því hver dagur er sérstakur ...
2.  Hver dagur sem maður lifir er góður dagur ...

Af einhverjum ástæðum náði sunnudagurinn 29. nóvember 2009 ekki að uppfylla bæði þessi markmið.  Of mikill hluti hans fór í innihaldslaust þjark um ekkert ...

Laugardagur 28. nóvember 2008

Nygårda er jóladrykkurinn hér í Svíþjóð ...

... í dag var smakk ...

  Drykkurinn kynntur til leiks ...

  Fyrstu viðbrögð við drykknum ...

  Seinni viðbrögð við drykknum ...

Niðurstaðan er sú að drykkurinn er alveg ágætur ...

---

Gagnavinnsla í dag ... þetta smá mjakast ...

---

Dóttirin ákaflega þreytt í dag.  Sofnaði kl. 10.30 í morgun eftir tveggja tíma vöku ... og svo aftur kl. 19 í kvöld.  Og svo enn einu sinni kl. 22 í kvöld.

Hún skrapp þrisvar sinnum út í dag ... fyrst út að leika, svo út í búð og svo út í göngutúr ... 

 

Föstudagsflétta II - 27. nóvember 2009

Þetta er nú búinn að vera meiri gagnavinnsludagurinn ... tölfræði, tölfræði, tölfræði ...

... eða eitthvað í þessa áttina ...

Mér er orðið illt í lærunum af setu dagsins ... mál til komið að hætta núna.

---

Guddan hefur verið dálítið örg í dag.  Lagði sig reyndar milli 5 og 7 ... var hressari á eftir.

Hvarf aftur inn í draumaheiminn upp úr kl. 10.

Þessa dagana er helsta viðfangsefni hennar að standa upp án þess að nota hendurnar ... það reynist stundum erfitt.  Reynir jafnvægi, kraft og skapsmuni.  Mest á það síðastnefna ...

---

Sá í fréttunum í dag að Dubai, stærsta borg Sameinuðu arabísku furstadæmanna, er sennilega að lenda í fjárhagskröggum.
Þegar við Lauga vorum þar í febrúar 2008, spáðum við því að þetta "system" þarna, myndi mjög fljótlega byrja að molna innan frá ...  

Maður er því ekki gapandi nú af undrun ... mikilmennskubrjálæðið að gera útaf við snillingana á þeim bænum ...

Lauga á Jumeirah-ströndinni í Dubai.  Í baksýn er eina sjö stjörnu hótelið í heiminum, Burj al Arab.  Ódýrasta herbergið á þeim bænum er um 130.000 kall/nóttin.

Dubai-ingar mega þó eiga það að þeir eiga besta flugfélag sem ég hef flogið með ... Etihad Airways ... sem var bara fremur ódýrt þegar ég flaug með því síðast. 

Fimmtudagsleggja II - 26. nóvember 2009

Hlutirnir að fara að stað hér í Uppsala.

Dóttirin fór í leikskólann í morgun, eins og lög gera ráð fyrir ... smá spenna í loftinu um hvernig hún myndi taka því, þar sem síðasti skóladagur fyrir Íslandsferð endaði með stóru bitfari á kinninni.
Það er víst búið að taka svolítið á málum bitvargsins.

Lauga í vinnunni í dag ... ekkert nema gott af því að frétta.

Sjálfur hef ég verið að vinna í doktorsverkefninu mínu í dag, auk þess að svara tölvupóstum og redda praktískum hlutum varðandi námið.

Eftir að hafa rýnt svolítið í gögnin er ég enn sannfærðari um að niðurstöðurnar verða stórmerkilegar.  Ég mun að sjálfsögðu birta þær á heimasíðunni minni þegar þar að kemur, eins og ég var búinn að lofa.

---

Í kvöld sýndi dóttirin enn einu sinni hversu mikill tæknisnillingur hún er.  Móðir hennar æpti upp yfir sig af undrun, þegar hún kveikti á sjónvarpstækinu með því að snerta hlið þess! 

"Hvernig fórstu nú eiginlega að þessu?!?"  Dóttirin skildi ekki alveg þennan hávaða og glápti á móðurina.  Svo benti hún á takka sem eru á hlið sjónvarpsins, og einmitt ætlaðir til að kveikja og slökkva.
"Ekki hafði ég hugmynd um að þetta væri hægt?!?" Móðirin leit á mig.

Sjálfur hafði ég ekki hugmynd um þetta væri hægt.

Snillingurinn á heimilinu gerir tilraun, sem annað heimilisfólk botnar ekkert í ... en það er sennilega enginn mælikvarði ...

Miðvikudagur 25. nóvember 2009 - Aftur til Svíþjóðar

Eins og gert var ráð fyrir í bloggi gærdagsins, þó með náð og miskunn almættisins, er þessi færsla skrifuð í Uppsala.

Það hefur bókstaflega ekkert gerst í dag nema það að við fluttum okkur yfir hafið, með mikið magn af farangri.  Farangursmagnið var ekki síst tilkomið vegna sjaldséðrar fyrirhyggju fjölskyldumeðlima minna í jólainnkaupum.

En nú er ekkert annað en að koma sér í gírinn á nýjan leik ... setja mulningsvélina aftur í gang, enda verkefnin ærin.

Í kvöld mun útdráttur úr rannsókninni minni verða sendur á IAPS 2010 ráðstefnuna sem haldin verður í Leipzig í Þýskalandi næsta sumar.  Áður en ég fór til Íslands, sendi ég uppkast af útdrættinum til Terry leiðbeinanda míns.  Við getum sagt sem svo að eftir þann yfirlestur sé útdrátturinn efnislega sá sami, en nokkuð ljóst er að ég má bæta mig mikið í skrifum á ensku.  Ég held að varla standi óhreyfð ein einasta setning sem ég skrifaði ... 

Já, og svo er gaman að segja frá því að fyrir nákvæmlega ári, upp á dag ... yfirgáfum við Ástralíu og skruppum til Auckland á Nýja-Sjálandi, á leið okkar heim til Íslands.
Það er því ljóst að 25. nóvember er svona "ferðadagur" hjá okkur þremenningunum ...

Síðuhaldari spáir í spilin á Sky Tower í Auckland, þann 25. nóvember 2008. 

Kunnuglegt andlit bíður eftir að flugvél Icelandair taki af stað frá Keflavík þann 25. nóvember 2009.

Hér er beðið á Arlanda flugvelli eftir lestinni til Uppsala, þann 25. nóvember 2009.

Annars er bara allt í þessu himnalagi ... 

Þriðjudagur 24. nóvember 2009

Í dag hefur þetta blogg mitt notið meiri vinsælda en áður hefur þekkst ...

Sennilega er það þó ekki vegna þeirra staðreyndar að fólk hafi uppgötvað hversu mikill snillingur ég er ...

.... heldur sú að fólk hefur áhuga á þeirri massífu uppgötvun að herra Helgi Seljan, sjónvarpsmaðurinn knái og herra Derrick, lögreglumaðurinn knái, eru nánast eins í útliti (sjá nánar hér) ...

Þar kom að því að bloggið mitt næði margumtalaðri15 sekúndna frægð ... sem er gott ...

---

Fyrir þá sem hafa meiri áhuga á mér og mínum, en Helga og Derrick, er gaman að segja frá því að Íslandsdvölin hefur gengið afskaplega vel.  Planið sem lagt var upp með í byrjun ferðarinnar gekk upp í öllum meginatriðum.

Fyrirlestrarnir tókust ágætlega, vinnutörnin á Blönduósi var "effektíf", tveir frábærir fundir hjá samtökunum Umhverfi og vellíðan, aðalskipulagsvinnan fyrir Djúpavogshrepp kláraðist, góð veisla var haldin á laugardaginn, auk þess sem margt skemmtilegt fólk varð á vegi mínum, bæði í heimsóknum og á förnum vegi ...

Til að setja punktinn aftan við, þá hóaði Leifur Hauksson í Samfélaginu í nærmynd á Rás 1 í mig í gær og fékk mig í stutt spjall og geta áhugasamir hlustað á viðtalið hér (klikka á Umhverfissálfræði). 

Hvern rakst ég svo á í Efstaleitinu??  Títtnefndan Helga Seljan ... !!!

... mér sýnist hringurinn því hafa lokast ... og tími til kominn að "pilla sér" ...

Næsta blogg verður frá Uppsala annað kvöld ... ef guð lofar ...

Fimmtudagur 19. nóvember 2009

Þá er maður kominn aftur til Reykjavíkur, eftir vinnuferð með mömmu til Blönduóss.  Skruppum reyndar í skottúr yfir Þverárfjallið, til Sauðárkróks, rétt til að heilsa upp á mæðgurnar og ömmuna og afann, langömmuna og langafann.

Komum í bæinn í hádeginu og ég vann frameftir degi með Andrési Djúpavogsoddvita, sem alltaf er uppbyggilegt og skemmtilegt.

Fór svo á stjórnarfund hjá Umhverfi og vellíðan, kl. 16.30.  Frábær fundur, mikið "kreativití" ... og bara æðislegt.

Til stendur að taka annan fund núna í kvöld, með spítalahópi samtakanna.  Það verður rosalega skemmtilegt er ég viss um!

 

Mánudagur 16. nóvember 2009 - Íslandsdvölin

Þá er maður nú mættur á heimaslóðirnar ...

Kalt og hvasst á Keflavíkurflugvelli við komuna þangað ... allt eins og það á að vera ...

Gott matarboð hjá Toppu systur í gær.  Þar voru auk heimamanna mættir góðir gestir, Hulda, Muggi, mamma, Daði og Stefán.

Þessir dagur hefur farið í að æfingar á fyrirlestri, örstuttan fund á Skipulagsstofnun og svo vinnu fyrir Djúpavogshrepp.
Það er líka allt eins og það á að vera ...

Þétt dagskrá framundan í Íslandsdvölinni ... Grjóteyri í kvöld, Hvanneyri í fyrramálið, Blönduós annað kvöld, Reykjavík miðvikudagskvöld, fundir á fimmtudaginn, vinna með Andrési Djúpavogsoddvita á fimmtudag og föstudag, veisla á laugardaginn ... og hittingur hingað og þangað ...

Svona á þetta vera ...

Laugardagurinn 14. nóvember 2009

Matseðill dagsins

- Tvær frosnar pizzur
- Fjórar kók í dós
- Flögur
- Tvö Snickers
- Häagen Dazs með jarðaberjum

Eins og má sjá, flugu mæðgurnar til Íslands í dag ... sjálfur datt ég í það ...

... og er með brjóstsviða núna ...

Af tilefni flugferðar mæðgnanna set ég þessa mynd ... hún er frá flugi okkar Laugu til Ástralíu í maí 2007 ...

Föstudagur 13. nóvember 2009

Það er lítið grín að vera bitinn í vinnunni ...

... dóttirin upplifði það í dag ... orgaði eins og ljón eftir ódæðið ...

Þarna má sjá fagurlega mótuð tannaför á kinn dótturinnar ... þetta hefur nú sjálfsagt ekki verið neitt sérstaklega þægilegt ...

Dagurinn hefur verið töluvert helgaður þeim tímamótum að Terry leiðbeinandi minn varð formlega prófessor í dag.
Ég skrapp á "serimóníu" í dag í aðalsal háskólans.  Kostuleg uppákoma ... formlegheitin og hefðirnar yfir og allt um kring.  Þrír mjög alvarlegir menn með pípuhatta gengdu mikilvægu hlutverki, sem aðallega fólst í því að ganga inn á sviðið og út af því aftur, til þess eins að endurtaka leikinn ...

Rektorinn, sem hefur nafnbótina Rector magnificus (hvorki meira né minna) sat í hásæti fyrir framan sviðið, ásamt vararektor og tveimur gamlingjum sem  ég veit ekki til hvers voru ... ætli það sé ekki bara hefð að tvímenningarnir séu í hásætunum við hátíðleg tilefni.

Svo var einhver stórkostlegur karakter, afar ábúðarfullur og alvarlegur, sem kom fram á sviðið í upphafi athafnar og hneigði sig.  Í lokin steig hann svo aftur fram og hneigði sig. 
Þar með var lokið góðu dagsverki hjá honum.

Músíkin var góð á athöfninni.  Það var stykki eftir Jean Baptiste Lully, Stefan Karpe og svo tónlist úr kvikmyndnunum "Pirates of the Caribbean", "8 1/2" og "Forest Gump".  Góð tilbreyting að fá að heyra lifandi kvikmyndatónlist. 

Svo í kvöld hélt Terry partý í Linné-trädgården.  Frábær matur og létt andrúmsloft.
Terry í sólskinsskapi og afar þakklátur.  Gaman að sjá þegar menn eru svona innilega þakklátir. 

Í ræðu sem hann hélt sagði hann að af helgidögunum, hann kynni alltaf að best að meta Þakkargjörðardaginn (nB! Terry er Kani) vegna þess að verslunarmönnum hefði aldrei tekist að "promotera" þann dag.  Skýringin á því væri einföld ... þann dag ættu menn að þakka fyrir það sem þeir hefðu ...

---

Lauga og Guddan voru í veislunni og skemmtu sér vel ... uns sú stutta varð að fara heim rétt fyrir níu-leytið.

Það hefði verið tilefni til að taka myndir í veislunni, en ég gerði það ekki ...