$440 beint í vasann ...

Það var rosalegur dagur í gær ... því í gær græddu Múrenan og spúsan hvorki meira né minna en um 440 ástralska dollara eða meira en 23.000 krónur íslenskar.  Og munar nú um minna!!
Ekki þó að skilja að dollararnir hefðu verið sendir í pósti til Múrenunnar og spúsunnar ... nei, miklu frekar var það vegna þess að Múrenan og spúsan sluppu við að greiða $440!!

Kíkjum á málið ...

Múrenan sagði um daginn söguna af því þegar hún og spúsan fengu himinháan símareikning frá símafyrirtækinu Three ... sem er fyrirtæki sem Múrenan fyrirlítur þessa dagana ...

Fyrirtækið sakaði hjónaleysin um "roaming" í ágústmánuði ... og vildi fá greitt fyrir það ...

Fyrir þá sem ekki skilja þetta þá skal það skýrt hérna:
Í bækling frá Three er búið að setja inn á kort, þjónustusvæði fyrirtækisins í Sydney ... svæði sem þekur mörg hundruð hektara og haldi viðskiptavinir fyrirtækisins sig innan þjónustusvæðisins, þá borga þeir samkvæmt fyrirframgerðum samningi, í tilfelli Múrenunnar og spúsunnar var umsamin upphæð $100/mánuð.
Noti viðskiptavinir hinsvegar símann frá Three utan þessa þjónustusvæðis kallast það "roaming" eða "flakk" og fyrir það er rukkað aukalega, og skýrist aukagjaldið af því að síminn tengist þá inn á kerfi hjá öðru símafyrirtæki og fyrir það ber að greiða.  Það er svo sem alveg skiljanlegt ...

Það sem hins vegar er illskiljanlegt er þegar viðskiptavinur er rukkaður fyrir "roaming" þegar hann hefur haldið sig hverja einustu sekúndu ágústmánaðar innan þjónustusvæðis Three .... en það var einmitt það sem Three rukkaði Múrenuna og spúsuna fyrir ...

Three rukkaði Múrenuna og spúsuna um 265 dollara eða um tæplega 15.000 krónur fyrir "roaming" ... fyrir það að vera utan þjónustusvæðis.  Þegar Múrenan óskaði eftir því að fá að vita hvar þau hefði eiginlega verið, harðneitaði Three að gefa staðsetningar upp, og hélt þess áfram að klifa á réttmæti áðurgreindrar upphæðar og blablabla ... og þess vegna varð Múrenan alveg snar!!  Spúsan varð líka snar!!

Í kjölfarið mölbraut Múrenan allar þær gullnu samskiptareglur sem hún hefur lært í gegnum tíðina og sagði svona í stórum dráttum að Three gæti bara hoppað upp í #%%""*""? á sér.  Því næst sagðist Múrenan ætla að halda áfram með þetta mál, við þetta yrði ekki unað ... 

Þegar hér var komið sögu var þjóska komin upp hjá Múrenunni, en Múrenan getur orðið þrjóskari en andskotinn, ef svo ber undir, enda ekki afkvæmi móður sinnar, bróðir Huldu systur sinnar og Stebba bróður síns, frændi Nikka og frændi Snorra Stefánssonar fyrir ekki neitt!!  Í 2 vikur var barist linnulaust með öllum tiltækum ráðum og eftir að hafa hótað að kæra Three fyrir "Australian Government´s Telecommunications Industry Ombudsman", sem er ríkisrekinn talsmaður neytenda í málum tengdum síma- og fjarskiptum, fóru hjólin loksins að snúast og Three felldi niður $265 ...

... og þetta fyrirtæki á bara að skammast sín!!!  Rukka Múrenuna og spúsuna fyrir þjónustu sem þeim var aldrei veitt!!!  Þetta er bara hreinn og klár þjófnaður!!

En svona til að farið sé rétt með, þá er Múrenunni sönn ánægja að tilkynna að hún og spúsan unnu málið ekki upp á eigin spýtur ... 

Sigurinn ber fyrst og fremst að þakka skólabróður Múrenunnar Crighton Nichols, sem sá um flest öll þau samskipti við Three sem máli skiptu ... Drengurinn var algjörlega eins og hakkavél og malaði hvern þjónustufulltrúann á fætur öðrum mélinu smærra.
En eins og Múrenan hefur sagt við Crighton, þá vill hún frekar láta hann fá $265, heldur en láta siðblint stórfyrirtæki tæta aurana upp úr vasanum ...

En djöfull stóð hann sig vel drengurinn ... !!!

Þarna fengust því 265 dollarar ... þá á enn eftir að skýra hvernig Múrenan og spúsan græddu hina 170 - 180 dollarana ...

Og það er auðvelt ... sko ... um daginn þá hætti minniskortið í myndavél spúsunnar og Múrenunnar að virka.  Það hætti að virka þannig að í stað þess að geta geymt eitthvað á 6. hundrað ljósmyndir, gat það geymt 35 myndir.  Nýtt kort kostar 70 - 80 dollara ... þegar Múrenan var næstum búin að borga fyrir nýtt kort, álpaðist hún til að spyrja afgreiðslumanninn, af hverju "kapasítetið" á minniskortinu hefði minnkað svona dramatískt.  "Prófaðu að "formatta" kortið", svaraði afgreiðslumaðurinn.  Múrenan og spúsan fóru heim og "formöttuðu" kortið og viti menn ... kortið var eins og nýtt ... Það þurfti ekki að kaupa nýtt kort!!!

Að auki við þetta spöruðust $100 þegar Múrenan skilaði inn umsókn um að "uppgreita" námið úr master í doktor.  Eftir að hafa samviskusamlega fyllt út umsóknina, sett inn kreditkortanúmer og fleira, tók starfsmaður Alþjóðaskrifstofunnar í háskólanum við henni og byrjaði á því að tilkynna að Múrenan þyrfti ekki að greiða $100 í vinnslugjald því hún væri nú þegar nemandi við háskólann í Sydney ... Múrenan var náttúrulega rosalega ánægð með það!!

Þetta er nú sagan af því þegar Múrenan og spúsan græddu 430 dollara á einum degi í Sydney!!

Til að halda upp á þennan árangur keyptu þau sér stórt heimskort og límdu það upp á vegginn í svefnherberginu ... þetta er dálítið óvenjulegt heimskort því Ástralía er á því miðju, í stað þess að vera neðst niðri í hægra horninu eins og flest öll heimskort sýna.  Annað skemmtilegt er að á þessu korti eru tvö Íslönd og tvö Grænlönd, efst í hægra horninu og efst í vinstra horninu.  Ekki dónalegt það!!

 
Spúsan og nýja heimskortið!!  Af hverju hún bendir á þennan stað á kortinu er Múrenunni ekki alveg ljóst!!

Gaman væri að fá að vita hvernig lesendum Múrenunnar í Sydney líkar við kortið!!

Fyrirlesturinn!!

Þegar þetta er skrifað, er heldur betur farið að styttast í að frænka Múrenunnar, Steinunn Vala Sigfúsdóttir, stigi í pontu á ráðstefnunni "Trjágróður til yndis og umhverfisbóta" sem haldin er á vegum Sumarhússins og garðsins, útgáfufyrirtækisins sem gefur út tímaritin "Sumarhúsið og garðinn" og "Gróandann".  Fyrir þá sem það ekki vita er Múrenan einn af pennum þessara blaða ... og hefur skrifað margar góðar og gagnorðar greinar í þessi blöð á síðustu misserum, sem ekki nokkur einasti maður ætti að láta framhjá sér fara ...

En aftur að ráðstefnunni ... það sem er merkilegt, að mati Múrenunnar, við það að frænkan Steina, er brátt að fara að stíga í pontu til að flytja fyrirlestur, er að Múrenan barði saman umræddan fyrirlestur.  Já, lesandi góður, hér í Sydney hefur Múrenan unnið að fyrirlestri sem fjallar um tré og áhrif trjágróðurs á líðan fólks.  Vonandi áhugaverðar pælingar fyrir einhverja, sem á fyrirlesturinn hlýða ...

Það er samt ótrúlega gaman fyrir Múrenuna að vera um það bil að fara að sofa á sama tíma og fyrirlestur sem varð til í hausnum á henni, er að fara út í loftið, hinum megin á hnettinum!!!
Í þessu tilfelli, eins og svo margsinnis oft áður, kemur berlega í ljós hversu "massíf" nútímatækni er, fyrirlesturinn ásamt glærusýningu, sendur á rafrænu formi mörg þúsund kílómetra á nokkrum sekúndum eða sekúndumbrotum ... ótrúlegt!!

Múrenan getur nú farið að sofa róleg ... vitandi það að Steina frænka mun rúlla þessu upp ... það er ekki nokkur spurning!!!

Og ef þú lest þetta, Steina mín ... þá segir Múrenan bara "break a leg"!!

Maraþonhlaupið!!

Ryðst nú Múrenan aftur fram á ritvöllinn, eftir nokkurt hlé ... þetta er endalaust kapp við tímann ...

En jæja, nóg um það!!

Það sem skal fjallað um nú er sigur Múrenunnar, já síðastliðinn sunnudag sigraði Múrenan sjálfa sig!!
Og hefst nú sagan af því ...

Á laugardeginum fyrir viku skráði Múrenan sig í sitt fyrsta maraþon-hlaup ... góðir lesendur, Múrenan tilkynnti á bloggsíðu sinni í maí síðastliðnum að hún ætlaði að hlaupa maraþon-hlaup í september og þess vegna skráði hún sig í Sydney-maraþonið ásamt um 1530 keppendum!!

Á sunnudaginn síðasta var svo komið að því að standa við stóru orðin ...

Múrenan byrjaði daginn á því að vakna of seint ... eða klukkan 6.00 í stað 5.15, þannig að tími til undirbúnings var afar takmarkaður, því meiningin var að ná lestinni klukkan 6.25.  Það tekur um korter að labba niður á lestarstöð þannig að glöggir stærðfræðihausar geta séð að einungis voru 10 mínútur til umráða ... hita hafragraut, borða hafragraut, fara í fötin, bera á sig sólarvörn, finna sokka, taka til nesti og sitthvað fleira!!

Þetta tókst nú samt og Múrenan var mætt við ráslínuna við norðurenda Hafnarbrúarinnar miklu hér í Sydney, klukkan 7.15 þegar skotið reið af ... markmið Múrenunnar var að skila sér í mark á innan við 4 klukkustundum.

Fyrstu kílómetrarnir voru náttúrulega bara djók ... ógeðslega léttir!!  Reyndar rumskaði Múrenan aðeins þegar hún krossaði 10 km línuna og í sömu andránni kom úr gagnstæðri átt Julius nokkur Maritim frá Kenýa, sem var þá um það bil að klára 24 km.  Þess má geta að Júlli vann hlaupið nokkuð örugglega á 2:14:37.  Eða til að setja hlutina í samhengi ... hann kláraði hlaupið nokkrum mínútum eftir að Múrenan tölti léttilega yfir línuna sem markaði að hlaupið væri hálfnað ... en þess má geta að Múrenan hljóp hálfa maraþonið (eða 21,0975 km) á 2:02:26, sem er svona allt í lagi, enda var hún að spara sig fyrir hinn helminginn.

Jæja, en upp úr þessu fór heldur að versna í því ... þreyta fór að segja til sín og tók því að reyna á hinn andlega styrk!!  Þegar 23 km voru sigraðir, taldi Múrenan sér trú um að hlaupið færi nú að styttast verulega, enda ekki eftir nema um 19 km!!  Þetta virkaði vel, og næst þegar Múrenan athugaði voru 26 km að baki ... svo 28 km!!  Þegar því marki var náð, var málið farið að vandast allverulega, enda kraftarnir orðnir af skornum skammti.  Frá og með kílómetra nr. 29 var hver kílómetri gaumgæfilega talinn ... "30, 31, 33, nei andskotinn, gleymdi ég að telja 32!!"

Jæja, en með einhverjum hætti hafði Múrenan sig þó í mark ... 42,195 km sigraðir á ...

fjórum klukkustundum, fjörutíuogsex mínútum og þrjátíuogátta sekúndum  eða 4:46:38!!

Langt frá upphaflegu markmiði ... en allavegana ... Múrenan kláraði dæmið!!

Tölfræðin er þessi:

Múrenan varð nr. 1232 af um 1530 keppendum en 1363 luku keppni.
Hún varð nr. 965 í karlaflokki af 1058 sem luku keppni.
Hún varð nr. 205 í aldurshópi 30-34 ára af 214 sem luku keppni.

En þess má geta að Múrenan var örugglega eini keppandinn sem dansaði þegar hún nálgaðist endalínuna ... tapaði vafalaust dýrmætum sekúndum en dansinn var stiginn til að skemmta áhorfendum, sem mættir voru!!

Múrenan lætur þetta duga í bili af maraþoninu, en vel getur verið að hún "analyseri" hlaupið betur á næstu dögum ... að síðustu eru nokkrar myndir ...

Kvöldið fyrir hlaupið!!

Múrenan á hlaupum ... alltaf hress ... gerir allt fyrir áhorfendur!!

Dansinn stiginn skammt frá marklínunni!!

42,195 km seinna ...

Múrenan komin heim og fagnar áfanganum ... gjörsamlega búin á 'ðí!!

Múrenan lá fyrir það sem eftir lifði dags ... gat varla hreyft sig ...

... og morguninn eftir ... "Jesús, hjálpi þér!!"

 

Ps. Múrenan myndi mjög gjarnan þiggja að fá huggulegar athugasemdir í athugasemdaboxið sitt ... oft þarf hún á stuðningi að halda, en sjaldan eins og nú!!

Trú, tungumál og skautar

Það er margt sem gengur á lífi Múrenunnar þessa dagana. 

Förum aðeins yfir þetta.

Fyrir það fyrsta er nú verið að sækja um að uppfæra meistaranámið yfir í doktorsnám.  Og telur Gary Moore prófessor og leiðbeinandi Múrenunnar að hún ætti að geta klárað doktorsnámið í desember 2009 sem er um það bil 2 árum fyrr en Múrenan hafði búist við upphaflega þegar haldið var í 'ann til Sydney í maí sl.

Í annan stað leggur Múrenan þunga áherslu á að öðlast ofurlitla innsýn í trúarbrögð.  Samnemendur Múrenunnar eru, eins og áður hefur verið greint frá á þessari síðu, frá öllum heimshornum og þar af leiðandi eru mörg trúarbrögð stunduð innan veggja arkitektadeildarinnar ... búddismi og islam er það sem Múrenan hefur verið að fræðast um síðastliðna daga.  Alveg stórmerkilegt  ... og það er líka alveg stórmerkilegt að fylgjast með múslimunum núna þegar Ramadan hefur gengið í garð.  Þeir mega ekki borða eitt einasta snifsi og ekki drekka dropa svo lengi sem sól er á lofti.  Hér í Ástralíu þýðir það um 14 klukkutíma fasta á hverjum degi í 30 daga.  Sem er nú bara slatti!!!  Það er líka alveg frábært að sjá hvað þetta fólk tekur trúna alvarlega ... það er ekkert grín í gangi þar!!  Enginn Múhammeð að auglýsa símafyrirtæki!!

Þá stundar Múrenan einnig nám í austrænum tungumálum, taílensku, kínversku og malísku (?!? - hér er átt við tungumálið sem talað er í Malasíu) ... lærdómurinn í dag var að læra að segja "já" ...
Tailenska: krap (með smá skrollandi r-i)  ... NB! krap er þó aðeins sagt ef verið er að tala við karlmann ... Múrenan man ekki hvernig "já" er sagt við konu!
Kínverska: Shi-da eða bara shi ... Hér er shi borið fram eins og spurning, þannig að áherslan endar "uppi" en da-ið er borð fram eins og svar, þannig að áherslan endar "niðri" ...  Múrenan hefur komist að því að Íslendingar eiga líklega auðvelt með að bera fram kínversku.  Gjörólíkt því sem blasir við Áströlunum, algjörlega vonlausir í kínverskum framburði!!
Maliska: jeg ... býsna líkt íslenska "ég"-inu nema hvað g-ið er óraddað.  Múrenunni fannst þessi útgáfa á "já"-i vera frekar fyndin en þó ekkert miðað við hvað Azman, hinum malasíska, fannst um íslenska "já"-ið.  Hann sagði það hjóma eins og nafn ... "til dæmis heitir margt fólk í Kína, Já", sagði hann.  Svona er það nú skrýtið!!

Í kvöld fór Múrenan á skauta, ásamt spúsunni, Rich, Jon, James, Neil og Fjólu. 

 
Standandi: Spúsan, Rich, James og Neil
Sitjandi: Múrenan og Fjóla
Liggjandi: Jon

Rosafjör, sem endaði með tímatöku ... sko, til að útnefna sigurvegara kvöldsins, en það er mikilvægur þáttur á svokölluðum "fun-nights" hjá Davies Street genginu (R+J+J+N+F), var boðað til kapphlaups.  Einfaldar reglur ... sá sem væri fljótastur að fara einn hring á skautasvellinu, hann ynni titilinn "maður kvöldisins".

Múrenan endaði í næstsíðasta sæti á tímanum 22,9 sekúndur, sem er ekki slæmur tími í ljósi þess að hún keyrði út úr brautinni!!  Þetta er eiginlega bara brilliant tími miðað við það!! ;)

Neil vann á 17,4 sekúndum, spúsan og Rich voru í 2.-3. sæti á 18,6, Fjóla á 20,6, James á 22,6, svo Múrenan og loks Jon á 25,eitthvað (NB! Tímarnir eru ef til vill ekki hárnákvæmir hjá Múrenunni, en svona var þetta í stórum dráttum).

Hér má sjá sigurvegarann í síðustu beygjunni ... 

Þegar þetta er skrifað (u.þ.b. 4 tímum eftir að svellið var yfirgefið) liggur spúsan fyrir, alsett marblettum eftir skautahlaupið ... hún datt mjög snyrtilega í eitt skiptið ... Múrenan hélt að dagar hennar væru taldir þegar hún horfði upp á ósköpin, sem voru þó ekkert miðað við það þegar Rich kom á fleygiferð yfir marklínuna, keyrði út af svellinu, á staur, flaug á hausinn og fékk 5 - 10 cm langan skurð á sköflunginn!!  Þar að auki var hann hér um bil búinn að slátra Múrenunni með þessum aðförum sínum, en Múrenan var í hlutverki ljósmyndara á þeim tíma!!

Hér kemur Rich í mark ... svipurinn gefur til kynna að eitthvað sé ekki alveg eins og það á að vera og það var svo sannarlega rétt.  Sekúndu síðar lá hann "utan vallar", slasaður ... Múrenan þakkar almættinu fyrir að hafa ekki orðið í vegi fyrir Rich í þetta skiptið!!!

Þess má geta að skautaferðin endaði eftir þetta atvik ... Rich fór á slysadeildina og voru þar saumuð 5 spor og var við hestaheilsu síðast þegar Múrenan vissi!!

Eins og sagt var í upphafi ... það er nóg að gera þessa dagana!!!

Máttur og verndun

Þessa dagana er Múrenan að setja saman fyrirlestur um áhrif trjágróðurs á sálarlíf fólks, en fyrirlesturinn á að flytja á ráðstefnunni "Trjágróður til yndis og umhverfisbóta" sem fer fram þann 27. september nk. í sal Ferðafélagsins í Mörkinni ... áhugasamir geta kíkt á http://www.rit.is/ til frekari upplýsingar.

En áhrif trjágróðurs og bara gróðurs yfirleitt hefur verið rannsakað töluvert á síðustu áratugum og sjá menn nú nokkuð sterka fylgni á milli gróðursins og vellíðunar fólks.  Sumir rannsakendur hafa meira að segja bent á að tengslin séu svo sterk að það eitt að horfa á gróður út um glugga, þó það sé ekki nema ein trjágrein, flýtir fyrir bata ef glímt er við veikindi ... já, svona er nú máttur móður náttúru mikill!!

Það sem virðist oft gleymast í umræðunni um skipulagsmál og umhverfismál er nákvæmlega þessi máttur ... með öðrum orðum, að það er beinlínis hollt fyrir fólk að horfa á náttúruleg "element"!  Í mjög einföldu máli má segja eftirfarandi:  Óröskuð náttúra er það besta fyrir sálartetrið, græn svæði, tré og annar gróður í borgum kemur þar á eftir og "hardcore" borgarumhverfi er það sísta ... og í þessu samhengi er bara verið að tala um sjónræn áhrif, ekki mengun og hávaða ... 

Verndun umhverfisins snýst því ekki bara um rómantík, lopapeysur og fjallagrös ... hún snýst einfaldlega um heilsu fólks!!

Um gildi þess að telja upp á 10

Jæja, það var víst þennan dag fyrir 6 árum að tvíburaturnarnir í New York voru keyrðir niður fyrir tilstuðlan misyndismanna ...

Múrenan hefur oft hugsað um það hvernig heimurinn hefði orðið ef Kanarnir, með "president Bush" í fararbroddi hefðu brugðist við með öðrum hætti ... þeir hefðu nýtt sér samúð heimsins og ákveðið að fara friðsamlegu leiðina.  Með öðrum orðum að ræða hlutina ... reynt að fá einhvern botn í málin, án þess að vera með ofstopa og djöfulgang!!

Þeir hefðu getað gert það, ef það hefði verið einhver skynsemisvottur í Bush og öllu liðinu sem stendur að baki honum. 

En þetta mál er afskaplega flókið og Múrenan stjarnfræðilega langt frá því að vera einhver sérfræðingur í því ...

Í ljósi þeirrar speki, að það sé heillavænlegra að fara friðsamlegu leiðina, getur Múrenan upplýst lesendur sína að það er 100% fylgni milli orða og athafna hjá Múrenunni.  Hún getur nefnt tvö dæmi sem áttu sér stað í dag, því til staðfestingar ... í bæði skiptin fann hún til vanmáttar síns, reiddist, langaði mest til að taka brjálæðiskast, en þess í stað taldi hún upp á 10 og hélt ró sinni, allavegana "ytri ró" og ætlar að reyna að leysa málin farsællega á næstu dögum ...

Kl. 9 í morgun, tiplar Múrenan léttlega, í sólskinsskapi út úr íbúðinni, eftir að hafa kvatt spúsuna með virktum.  Um leið og hún skundar fram hjá póstkassanum, rekur hún augun í bréf sem á var letrað "Pall Lindal".  Það hlaut því að vera til Múrenunnar og því reif hún það upp og viti menn ... á uppúrdregnum reikningi frá símafyrirtækinu Three, stendur "Amount to be debited $377.65"!!

Það þarf ekki að fara mörgum orðum um það að Múrenan gjörsamlega fríkaði út!!!  $377.65 eða um 20.000 ÍSK fyrir síma- og internetþjónustu í ágúst 2007!!!  Múrenan gerði samning við þetta skrattans kompaní upp á $98/mánuð í maímánuði!!! 

Múrenan þaut eins og eldibrandur niður í Three verslunina sem er staðsett á Oxford Street ... "Djöful skal ég láta þessa helvítis drullusokka heyra það!!!"  En sem betur fer hafði Múrenan þó vit á því að telja upp á 10 á leiðinni, þannig að þegar hún kom í búðina, hafði hún komist að því að líklega væri best að "rífa ekki barkann úr afgreiðslumanninum", frekar tala við hann í rólegheitum.

Og það kom á daginn ... afgreiðslumaðurinn var hinn liðlegasti og útskýrði fyrir Múrenunni að hún hefði greinilega notað internetið utan þjónustusvæðisins, og því væri rukkað sérstaklega fyrir það.  Málið er hins vegar það að Múrenan hefur alið manninn inn á þjónustusvæði Three í Sydney allan ágústmánuð!!!  Og það sem betra er ... internetið hefur aldrei nokkurn tímann verið notað utan heimilis Múrenunnar í Bourke Street!!!  Þetta er því bara tómt kjaftæði ...

En vegna þess að Múrenan óð ekki eins og óður tarfur inn í verslunina, reyndi afgreiðslumaðurinn að gera allt sem hann gat til að leysa málið og nú er það í gagngerri skoðun hjá þessu blessaða fyrirtæki ...

Hitt tilfellið er af allt öðrum toga.  En í kennslustund í dag lenti Múrenan í heilmikilli "diskússjón" um námsefni dagsins ... það verður ekki farið nánar út í það hér, enda líklegt að hinn almenni lesandi hafi engan áhuga á því ... áhugasamir geta sent póst á Múrenuna ...
Eins og svo oft áður, lenti Múrenan í þeirri klemmu að heilastarfsemin fór öll fram á íslensku og enskur orðaforði var ekki á takteinum þegar á þurfti að halda ... því gerðist það aftur og aftur að það var stungið upp í Múrenuna, án þess að hún gæti komið neinum vörnum við!!  Hún hefði getað gert það á íslensku en það hefði dugað skammt í aðstæðum dagsins!!

Þetta gerði Múrenuna alveg trítilóða ... en sem fyrr, einbeitti hún sér að því að róa sig niður, í stað þess að láta bara hnefana tala!!  En rosalega langaði hana til þess!!!
Dvölin hér í Ástralíu hefur sýnt Múrenunni það ótal sinnum, hvað tungumálið er ótrúlega sterkt vopn ... alltént þegar maður getur ekki talað hindrunarlaust, getur ekki sagt nákvæmlega hvað maður meinar, getur ekki sagt brandara, skotið inn athugasemdum, getur ekki útskýrt ... þá finnur maður svo oft til hjálparleysis ... og það fer alveg hrikalega í taugarnar á Múrenunni!!!

Það er nefnilega þetta hjálparleysi sem er svo erfitt að díla við ... Kaninn var hjálparlaus þann 11. september 2001, þegar flugvélarnar tvær keyrðu inn í turnana í New York og sú þriðja lenti á Pentagon ... mesta hernaðarveldi veraldar var máttvana og það fór greinilega svo í taugarnar á þeim að þeir ákváðu að hefna sín grimmilega og sýna vald sitt ... heimskulegt??  Já!!

Múrenan er hjálparvana í baráttu sinni við Three ... hún vonar bara að fyrirtækið sjái að sér ... ef ekki, verður hún bara að borga þessar $377.65 þegjandi og hljóðalaust!!  Hún getur svo sagt skilið við fyrirtækið ... en hvað með það ... þeir eru búnir að stórgræða á henni hvort sem er!!
Múrenan er líka hjálparvana þegar kemur að því að halda uppi almennilegri rökræðu um námsefnið ...

Þetta er óþolandi en með því að telja upp á 10, er alveg ótrúlegt hvað maður þolir og hvað maður getur komið í veg fyrir að gera ranga hluti ... eitthvað sem erfitt væri að bæta fyrir eftir á!!

Svona hljóðar nú pistill Múrenunnar í dag!!

Ólík viðmið

Í gær, spurði Sha-bo, félagi Múrenunnar frá Taiwan, hvað byggju margir á Íslandi.  "300.000" svaraði Múrenan um hæl og til öryggis skrifaði hún töluna niður, vitandi það að fólk frá þessum heimshluta, þar sem íbúafjöldi er talinn í milljónum, skilur ekki íbúafjöldann á Íslandi.

Eftir bakföll af undrun, reisti Sha-bo sig við og spurði í fullri alvöru: "Þekkir þú alla á Íslandi?"

Já, það er óhætt að segja að viðmiðin eru ólík.  Sjálfur segist Sha-bo koma frá mjög litlum bæ í Taiwan, svona 200.000 manns sem búa þar.  "Mjög lítill bær."

Taiwan er um þrisvar sinnum minna en Ísland og íbúafjöldi þar er 23.000.000.  Efnahagsástand er gott og kínverska heimsveldið því sólgið í yfirráð yfir eyjunni litlu ...   

Hver man ekki eftir "Made in Taiwan"??

Barseta Múrenunnar ...

Nú er 3ja daga helgi að baki hjá Múrenunni og næsta vika blasir við björt og frískandi ...

Þessi helgi hefur við töluvert merkileg fyrir margra hluta sakir og hefur sumt af því verið rakið nú þegar hér á síðunni.  Það sem hins vegar hefur ekki verið minnst á, er óvenju óvenjulegur laugardagur í lífi Múrenunnar, sem átti sér stað í gær.

Í fyrsta skipti á ævinni, eyddi Múrenan bróðurpartinum af deginum á bar ... já, frá klukkan 12 á hádegi til klukkan 19.30 hékk hún eins og hver annar róni á hverjum barnum á fætur öðrum. 

Allt byrjaði þetta þó að því að Múrenan fór að mótmæla APEC ásamt spúsunni ... eða mótmæla APEC(?!?)  Það var nú kannski ekki alveg málið ... Múrenan hafði ekkert á móti APEC í raun, en jú, hún er á móti Íraksstríðinu og aðild Íslands að því, og finnst líka að Ástralir, Bandaríkjamenn og Kínverjar geti vel reynt að komast niður á einhverja niðurstöðu varðandi "global warming" ... Þess vegna fór Múrenan að mótmæla því ... svo var hún nú náttúrulega í hlutverki fréttaritara FMS (Fréttastofu Múrenunnar í Sydney).  Jæja, en nóg um það ... þessi pistill átti að fjalla um hangs Múrenunnar á börum í Sydney!! 

Fyrsti barinn sem var heimsóttur var, bar fyrir samkynhneigða á Oxford Street.  Vart hafði Múrenan fengið sér sæti þegar "skemmtikraftur" sem líklega hafði vakað samfleytt í um 68 klukkutíma og drukkið nokkrum bjórum meira en hann hefði átt að gera, birtist eins og þruma úr heiðskíru lofti.  Hann vildi óður og uppvægur bjóða upp á skemmtiatriði.  Hann rétti fram þrjá af fimm fingrum hægri handar og óskaði eftir því að togað yrði í einn þeirra.  Spúsan brást vel við beiðninni og togaði og um leið og það hafði verið gert, hóf skemmtikrafturinn upp rausn sína.  Hann taldi sig sum sé vera í hlutverki nokkurs konar "glymskratta". 

Langatöngin bauð til dæmis upp á "Wonderworld", sem Oasis gerðu frægt hér einu sinni.  Flutningur lagsins átti þó fátt skylt við flutning Oasis því söngurinn var vægast sagt hræðilegur og fór illa í hið viðkvæma og músikalska eyra Múrenunnar.  Henni létti því verulega þegar skemmtikrafturinn var dreginn í burtu.  Já, afskaplega "huggleg" vinkona, sem sjálfsagt var búin að vaka jafnlengi og drekka jafnmikið og skemmtikrafturinn, dró hann "af sviðinu" algjörlega óumbeðin, þrátt fyrir hávær mótmæli og kraftmikla andspyrnu af hálfu skemmtikraftsins.

Fyrir þetta afrek ákvað Múrenan að skrá þessa konu sem vinkonu sína í Facebook og skrifaði á "vegginn" hjá henni smá þakklætisvott fyrir það eitt að fjarlægja þetta "mikla talent"(?!)

Jæja, eftir þetta, kláraði Múrenan Spite-ið og hélt af stað á næsta bar ... einhvern bar á Crown Street.  Þar var boðið upp á beina útsendingu frá áströlskum fótbolta.  Múrenan og spúsan, sem nota bene var með í för, eins og áður hefur verið greint frá, ákváðu að fá sér góða samloku og greiddu fyrir það slétta 30 ástralska dollara.  Múrenunni fannst samlokan bara fjári góð og á meðan flutningur hennar af disknum ofan í maga Múrenunnar fór fram, fræddi samferðamaður og leiðsögumaður dagsins Crighton nokkur Nichols, Múrenuna um töfra og leyndardóma fótboltans, þess ástralska það er að segja ...

Múrenunni dettur þó ekki í hug að fara neitt að úttala sig um reglurnar hér á þessari vefsíðu, og enn síður ætlar hún að fara ofan í saumana á leikreglum krikketsins, sem hún á fremur bágt með að skilja þrátt fyrir að hafa á síðustu tveimur vikum fengið útskýringar beint í æð tvisvar sinnum, frá þaulvönum krikketspilurum og krikketáhugamönnum.  Það eitt að vita að einn bévítans krikketleikur getur tekið um 5 daga og að krikketspilarar fara í morgunmat, hádegismat, kaffi og hætta svo snemma til að ná kvöldmat, er nóg til þess að Múrenan fyrirlítur þessa íþrótt!!!  Fara í kaffi í miðjum leik!!!  Það hljómar náttúrulega fáránlega ... en hvað eiga leikmenn svo sem að gera þegar einn leikur stendur yfir í hérumbil viku!! 

En eftir útskýringar á áströlskum fótbolta og krikket, var haldið áfram á næsta stað ... já, það var að vísu ekki bar í eiginlegum skilningi ... því það var heimili Crightons, sem er við Crown Street.  Svona til að upplýsa lesendur, þá er umræddur Crighton, bekkjarbróðir Múrenunnar í háskólanum og þrátt fyrir stutt kynni hefur tekist með þeim ágætis vinskapur og Múrenan telur Crighton vera prýðisnáunga!!

Crighton bauð upp á rauðvín, sem Múrenan þáði ekki, enda stakur bindindismaður þar á ferð, en aðrir samferðamenn þáðu ... bíðum nú við ... aðrir samferðamenn voru Matthew, Chris, Peter, kona Matthews og margnefnd spúsa.  Allir þessir aðilar vættu kverkarnar með rauðu víni meðan Múrenan teygði Coke Zero, í fyrsta skipti á ævinni ...

Svo var haldið niður á bar á horni Bourke Street og Cleveland Street ... og þar var setið lengi ... flestir voru þá komnir í bjórstuð og runnu ófáir bjórarnir niður í ófáa belgina það sem eftir lifði dags.  Múrenan hefur oft velt fyrir sér hvers vegna í ósköpunum, fólk drekkur alltaf svona rosalega mikið af bjór þegar það fer á bar.  Á 4 klukkutímum drakk Múrenan 2 vatnsglös og spúsan eitt en sessunautar þeirra drukku að minnsta kosti 10 bjóra hver, auk annarra veiga. 

Þetta er nú meiri þorstinn!!!  Ef hver bjór er um hálfur lítri þá er verið að drekka 5 lítra af bjór á 4 klukkutímum eða um 1,25 lítra/klukkutíma ... sem væri kannski skiljanlegt ef menn skryppu alltaf út og hlypu 10 km eftir að hafa hvolft ofan í sig 1,25 lítra og væru orðnir frávita af þorsta þegar þeir kæmu aftur.  En nei, nei ... menn sitja bara á görninni, segja brandara og verða fyrir vikið alveg afskaplega þyrstir ... þetta er eitthvað sem Múrenan finnur ekki fyrir ... hún getur reytt af sér brandara í marga klukkutíma og þarf bara að væta varirnar rétt öðru hverju!!!

Fleira fólk bættist í hópinn ... Brendan nokkur mætti, ásamt pólskum læknanema og nokkru síðar birtist hinn svissneski Sebastian.  Múrenan getur ekki frætt lesendur nokkurn skapaðan hlut um þetta fólk nema það að kona Brendans, les stundum fréttirnar á Channel Nine ...  Fjóla og Neil létu svo sjá sig upp úr klukkan 18.30. 

Þetta var stórfínn félagsskapur ... reyndar var hann orðinn fullyfirspenntur í lokin vegna ölvunar nokkurra aðila, aðeins of mikið af aðeins of lélegum bröndurum og faðmlögum ... aðrir voru hófstilltari ...

Eins og sagt var í upphafi, þetta var fyrsti dagurinn í ævi Múrenunnar sem fer í að sitja á bar ... fram að þessu hefur Múrenan frekar farið á bari að kvöldi til, og setið þar fram á nótt.  En eins og kannski margir vita sem þekkja Múrenuna, þá er barseta ekki meðal þess sem er, öllu jafna, efst á verkefnalistanum hjá Múrenunni ... þannig að framganga gærdagsins var bara töluvert afrek og alveg þessarar bloggfærslu virði!!

Svo mörg voru nú þau orð!!!

Mótmælin ...

Múrenan mætti stundvíslega á mótmælafundinn sem haldinn var í miðbæ Sydney í dag ... það var verið að mótmæla öllum fjandanum en þó beindust flest spjótin að tvíeykinu John Howard forsætisráðherra og hinum "sívinsæla" George W. Bush.  Þeir tveir hafa örugglega verið með bullandi hiksta í allan dag ... jæja og þó, þeir hljóta nú örugglega að vera komnir yfir hikstastigið ... allavegana Bush!!

5.000 - 10.000 manns létu sjá sig ... með öðrum orðum,  það var slatti af fólki, mörg spjöld á lofti, slagorð hrópuð, ræðu haldnar, sungið og dansað.  Lögreglan umkringdi samkomuna ... greinilega gífurlega vel undirbúin.  Einn ræðumaðurinn í dag sagði að lögreglan í Sydney hefði þessa APEC-daga, yfir að ráða tvöfalt fleiri lögreglumönnum, en finna má í Bagdad, stríðhrjáðustu borg heimsins þessa stundina. Fréttastofa Múrenunnar selur þó þessar upplýsingar ekki dýrari en hún keypti ... henni fannst þó ræðumaðurinn gleyma að minnast á að hermenn í Bagdad eru líklega talsvert fleiri en í Sydney.  Það gæti kannski skipt einhverju máli eða ... ??

Myndirnar hér að neðan eru af vettvangi dagsins ... SBS fréttastofan, samstarfsaðili Fréttastofu Múrenunnar í Sydney lýsti atburðum með eftirfarandi hætti á vefsíðu sinni: "One wedding, no funerals, two injuries and 17 arrests – the hugely hyped APEC protest rally went off without any serious incident" (Ein gifting, engin jarðarför, tvö slys og 17 handteknir - ofurauglýstu APEC mótmælin fóru fram án alvarlegra vandræða).  Múrenan tók virkan þátt ... bæði sem fréttamaður en einnig sem mótmælandi.  Sjón er sögu ríkari ...

APEC-dagurinn

Sérkennilegur dagur í Sydney ... en í dag var 6. dagur APEC-fundarins, en fyrir þá sem það ekki vita stendur APEC fyrir Asian Pacific Economical Cooperation. 

 

Þannig að þessa dagana er nóg um að vera ... 21 þjóðarleiðtogi er mættur, ásamt fylgdarliði, sem telur allt frá nokkrum hræðum í sumum tilfellum til 650 manna sem sjá um að ekkert fari úrskeiðis hjá forseta voldugasta ríkis veraldar ...

En af hverju var dagurinn svona sérstakur??  Jú, það einkum vegna þess að í dag var almennur frídagur ... já ríkisstjórn Ástralíu, yfirvöld í New South Wales og æðsta ráð í Sydney komust að þeirri niðurstöðu meðan á undirbúningi fundarins stóð, að best væri að gefa fólki frí í dag, 7. september!!  Ekki var það nú af hugulsemi við hinn vinnandi mann, miklu frekar var það gert til að auka líkurnar á því "öryggisystemið" gæti gert skyldu sína og passað upp á Bush, Pútín, Hu og alla hina karlana og kerlingarnar.  Einnig var þessi ráðgerð liður í því að koma í veg fyrir algera óöld í miðbæ borgarinnar, því allar helstu götur miðbæjarins er lokaðar almennri umferð og gangandi umferð þarf að fylgja mjög ströngum reglum.  Það er með öðrum orðum, ekki auðsótt mál að spígspora sér til yndisauka í bænum, hvað þá að vera alvarlega þenkjandi "businessmaður" sem þarf nauðsynlega að komast leiðar sinnar - ómögulegt!! 

Þess vegna gaf Howard forsætisráðherra öllum frí, eftir að yfirvöldin öll höfðu fundað um málið, og bað hann fólk helst að fara eitthvað út úr bænum ... "bara í guðanna bænum, verið ekki fyrir!!"  Það voru skilaboðin!  Og sumir eru ævareiðir yfir þessu ... finnst illa brotið á sér að geta ekki gengið um göturnar hindrunarlaust!!  En við erum náttúrulega að tala um að Bush er í bænum!!

Jæja, en Múrenan fór samt ekkert eftir því sem Howard óskaði eftir. Þvert á móti.  Hún beið eftir að APEC-dagurinn myndi renna upp bara til þess að fara í bæinn ... og sá ekki eftir því.  Í miðbænum mátti upplifa algjört lögregluríki, þar sem vart var hægt að þverfóta fyrir laganna vörðum ... 2,5 metra háar stálgrindur meðfram öllum götum, lögreglubílar, lögreglustrætóar og lögreglumótórhjól voru í bland við gangandi lögreglumenn og hjólandi lögreglumenn.  Leyniskyttur upp á öllum helstu byggingum og yfir öllu þessu sveimuðu svo sex þyrlur linnulaust, klukkutímum saman.  Út á Sydney-höfninni, þutu lögreglubátar fram og aftur, stjórnuðu ferjusiglingum og annarri skipaumferð með harðri hendi ... í nágrenni fundarstaðarins mikla, mátti ekkert skip fara nær landi 50 - 100 metra.

Já, þetta var vissulega assgoti tilkomumikil sjón ... þetta var svona eins og að vera staddur í bíómynd.

Reyndar mátti litlu muna að Múrenan hefði verið handtekin fyrir myndatökur af bækistöðvum lögreglunnar í nágrenni við Bentstræti.  Í miðju kafi við að festa augnablikin á "filmu", kemur ekki lögreglumaður, með samanbitnar varir upp að Múrenunni og skipar henni ógnandi að koma sér í burtu, því myndatökur væru bannaðar!!!  Til að byrja með beitti Múrenan alþekktu bragði, sem var að svara spurningum löggunnar á íslensku ... það virtist ekki skipta vörð laganna neinu máli ... "NO PHOTOS ... THIS IS A SECURITY ZONE ... NO PHOTOS!!!"  Fas og handabendingar gáfu svo ennfrekar til kynna að það var víst hyggilegast að vera ekki með nein uppsteit ... Múrenan hafði á þessu augnabliki tekið þrjár myndir ... og sökum mikils heiðarleika, skipti hún yfir á ensku og spurði hinn ógnandi lögreglumann hvað hann vildi að hún gerði við myndirnar.  "EKKERT ... KOMDU ÞÉR BARA Í BURTU!!!"  Svo mörg voru þau orð!!  Múrenan skilur ekki enn ... af hverju hún mátti ekki taka myndir af bækistöðvunum úr því hún mátti halda myndunum sem hún hafði þegar tekið ... ???!?!  En hún fór eftir "ordrum" yfirvaldsins og pillaði sér í burtu ... (ein myndin er hér að neðan ;) )

Almennt séð er ekki alltaf gott að skilja lögregluyfirvöldin, hvert þau að fara ...

... en í þessu tilfelli mátti náttúrulega álykta sem svo að þau væri að hífa upp um sig buxurnar eftir niðurlæginguna í gær þegar "Osama bin Laden og fylgdarlið" komust um bil inn á hótelherbergið hjá Bush ... fyrir þá sem ekki vita þá stóðu ástralskir grínarar bakvið þetta uppátæki og satt að segja máttu þeir þakka fyrir að vera ekki skotnir "right between the eyes" þegar þegar stigu út úr bílunum, í dulargervum sínum.  Í fréttum mátti heyra að öryggisvæði fundarins hér í Sydney, væri næstum því 400 kílómetra radíus frá fundarstað APEC.  Í ljósi þess er það fullkomlega óskiljanlegt hvernig í fjáranum þeim tókst að komast í gegnum þessa víglínu ... á leið sinni að heimsækja Bush.  Það var ekki fyrr en á "checkpointi" á horni Macquariestrætis og Bentstrætis að öryggissveitirnar sáu við þeim, aðeins nokkrum húsalengdum frá gististað forsetans ... en þetta eru náttúrulega gamlar fréttir og ekki Fréttastofu Múrenunnar í Sydney (FMS) til framdráttar!!

(En hér er eitt checkpointið sem "hirðfíflin" fóru í gegnum vandræðalaust ... )

En svona er sum sé ástandið hérna megin jarðarkringlunnar ... árangur fundarins lætur eitthvað á sér standa, samkvæmt heimildum FMS.  Mesta fréttin er eiginlega sú að vinur Johns Howard hjá "pressunni" sagði í dag að Howard ætti bara að hætta að vera forsætisráðherra og fara heim og leggja sig.  Howard varð auðvitað stórmóðgaður ... tímasetningin náttúrulega afleit.  Maðurinn er að halda stórt partý og svo kemur bara einhver fréttasnápur og segir honum að hann sé ömurlegur ... í miðju partý ... og svo er bætt um betur þegar rekin er framan í hann glóðvolg skoðanakönnun sem sýnir að hann er algjörlega að gera í brækurnar!!  20% forskot hjá "Labour Party" og Kevin Rudd, aðalóvini Howard.  Það sér náttúrulega hver maður að þetta er nú ekki fallegt!!  Það er verið að eyðileggja 2.000.000.000 króna partý!!!

Jæja, nóg í bili ... í fyrramálið mun FMS fara í og fylgjast með mótmælagöngu ... það verður rosalegt!!  20.000 manns væntanlegir og búist við látum ... spennandi!!  Íraksstríðinu, global warming og einhverju fleiru verður mótmælt ... verið því stillt á FMS á http://www.murenan.blog.is/  Lögregla er, í þessum skrifuðum orðum, að vígbúast!!!