Textagerð

Í morgun áttum við Lauga skemmtilegt samtal einu sinni sem oftar ... og í þetta sinnið barst talið að textagerð og lagasmíðum.  Tókum við til að rifja upp hvaða afrek við hefðum unnið á því sviðinu allt fram á þennan dag.  Lauga gat nú bara nefnt, held ég, einn texta sem hún samdi og er hann að mínum dómi ákaflega einfaldur og innihaldslaus ...

Hann er svona:

Ég sagði nei, nei, nei, nei, nei nei ... (og nei-ið endurtekið 100 sinnum eða svo)

Mín afrek eru miklu betri.  Eftirfarandi er texti við lag sem hljómsveitin Mini-KISS flutti á fyrri hluta 9. áratugar síðustu aldar.  Lagið var hljóðritað í herberginu mínu á Bergstaðastrætinu.  Kristján vinur minn söng og ég lék á trommur.  Því miður hefur hljóðritunin glatast en textinn mun lifa um ókomna framtíð!!

Leikurinn
(Kristján Magnússon / Páll Jakob Líndal) 

Ég vildi að ég væri orðinn Karate Kid,
þá mun ég segja, segja hid.
Þessi leikur er frá Liverpool,
Liverpool og Manchester United keppa frúm.
Liverpool er með boltann hér,
gefur á Ken Dalgish sem skorar á mínútunni,
hann má ekki gefa frá sér.
Hann segir: "Eitt, núll"
og skorar vúll!!
Það var "skeytin inn" ég trúði því varla svo skjótt.
Ég horfði á leikinn og spilaði mig svo fljótt
Ég ætlaði að skjóta "skeytina inn".
En þá kom litli, ljóti, myglaði sonurinn minn.
"Svaraðu já, segðu nú nei,
ég fel ekki grasið og segðu svo hey"!!
Ég vissi ekki fyrr en ég var að vinna keppnina með mér ... hey!!

Úúúvvaaaaa ... ef ég væri Pamela í Dallas!!!

Síðasta línan var ekki hluti af upphaflegum texta, og viðurkenndi Kristján eftir að hljóðritun hafði átt sér stað, að hann hefði bara ekki vitað hvað hann átti að segja meira og því hefði hann bætt þessu við, meira svona vegna óöryggis en listræns innsæis. 
Ég verð samt að segja að raddlega séð, var síðasta línan besta frammistaða Kristjáns í laginu.  Hún var gjörsamlega frábær!!

Í Steinnesi, á svipuðu tímabili og við Kristján héldum úti hljómsveitinni Mini-KISS, rak annan snjallan texta- og lagahöfund á fjörur mínar.  Hét sá og heitir enn Arnar Freyr Vilmundarson. 

Við sömdum saman tvær ódauðlegar perlur.  Önnur þeirra hefur beina vísun í vinnu sem við Arnar stunduðum á þeim tíma, sem var að horfa löngum stundum á heyblásara, matara og færiband vinna vinnuna sína við að koma heyi úr heyvagni og inn í hlöðu. 
Ef verið var að taka saman vothey, var maurasýra (myresyre) blönduð saman við heyið, en slíkt er nauðsynlegur liður í votheysverkun.  En vegna þess hversu hættuleg maurasýra en ákvað Magnús bóndi eitt sinn, að breyta til að nota þess í stað hvítt duft, sem bar heitið "Kofasalt".  Þess má geta að "Kofasaltið" átti eftir að verða bylting í starfi okkar Arnars. 
Eftirfarandi texti fjallar um þetta allt saman.

Myresyre
(Arnar Freyr Vilmundarson / Páll Jakob Líndal)

Myresyre, myresyre, kofasalt, kofasalt
myresyre, myresyre, kofasalt, kofasalt  

Annar texti kom líka til okkar, og var sá byggður á sívinsælli sögu um Rómverska riddarann og er eftirfarandi:

Rómverskur riddari
(Arnar Freyr Vilmundarson / Páll Jakob Líndal)

Rómverskur riddari réðst inn í Rómaborg
rændi þar og ruplaði rúbínum og risagimsteinum.
Rigning var og rosa rok.
Reiður rýtinginn hann reif af risavöxnum róna
sem ræktað hafði rófur, rabbabara og rúsínur!!
Hvað eru mörg R í því?

Bæði lögin voru mjög rokkuð og undirleikur var á smurolíutunnur og hlöðudyr (reyndar var hætt að nota hlöðudyrnar til undirleiks, eftir að við vorum eitt sinn spurðir, hvað hefði eiginlega komið fyrir dyrnar ... en það sást "aðeins" á þeim eftir flutning laganna).  Upptökur fóru því miður aldrei fram á þessum góðu lögum.

Nokkrum mánuðum síðar, á Seltjarnarnesinu, nánar tiltekið heima hjá Arnari, fæddist þetta textabrot ... því miður man ég ekki meira af því.  Upptaka fór fram á þessum texta, en hefur hún nú glatast, geri ég ráð fyrir.

Algjör
(Arnar Freyr Vilmundarson / Páll Jakob Líndal) 

(texta vantar) ...
Algjör byrja, algjör byrja,
algjör, algjör kaktus ...
Pabbi minn er algjör feitur flóðhestur!!

Einn góður texti var líka samin í samvinnu við Palla frænda minn.  Sá texti var tileinkaður playmói, leikföngum sem við elskuðum.

Playmóbíl
(Páll Eiríksson / Páll Jakob Líndal) 

Ég leik með playmóbíl,
ég elska playmóbíl.
O je!!

Síðast en ekki síst ber að nefna mjög vandaðan texta sem við bræður, ég og Stebbi, sömdum saman uppi í rúminu hennar ömmu, um svipað leyti og frægðarsól Bjartmars Guðlaugssonar skein sem skærast og hver smellurinn rak annan.  Texti okkar bræðra var við hið sívinsæla lag "Súrmjólk í hádeginu, Cheerios á kvöldin".  Hafði textinn beina skírskotun í heimilislífið á Bergstaðastrætinu og var hann eftirfarandi:

Viský og ákavíti
(Stefán Jón Jeppesen / Páll Jakob Líndal)

Viský í hádeginu, ákavíti á kvöldin,
Palli drekkur þetta allt saman af stút.
Viský í hádeginu, ákavíti á kvöldin,
Mamma er orðin hundleið á þessum drykkjurút!!

Þegar við fluttum svo lag og texta fyrir ömmu, varð hún í stuttu máli, ekki hrifin, bað okkur að láta ekki nokkurn mann heyra þetta og bað Guð almáttugan að varðveita okkur.  Þrátt fyrir að vilja allt fyrir ömmu okkar gera, skelltum við skollaeyrum við þessari bón hennar og enn í dag, lifir textinn góðu lífi.

Athugasemdir

[frex (IP-tala skráð) 16.4.2008 kl. 08:54]

einhver besta bloggfærsla í sögu mannsandans. deginum bjargað.

[Helga Guðrún (IP-tala skráð) 19.4.2008 kl. 10:53]

Bara snilld! Ég man eftir þessum texta hennar Laugu, hann var mikið sunginn á tímabili við mikla gleði söngmanna (en sennilega fárra annarra). Þínir textar eru vissulega mun fjölbreyttari og innihaldsmeiri. Við Lauga eigum þó eitt afrek í sönglistinni sem ekki verður frá okkur tekið. Það er þegar við sungum stanslaust hástöfum kátir voru karlar minnir mig, sitjandi á kerru sem dregin var eftir holóttum moldarvegi frá Kálfárdal og niður að "vegi". Tilgangurinn var, auk þess að skemmta okkur, að verða alveg þegjandi hásar. Það eina sem við uppskárum hins vegar var þykkt ryklag sem þakti okkur frænkurnar, þar með taldar tennur og munn. Snýturnar úr okkur báru þessu ferðalagi okkar einnig merki. Okkar fallegu smástelpuraddir voru hins vegar alveg jafn sterkar og fallegar þrátt fyrir þessa illu meðferð okkur til sárrar skapraunar :O)

[Lauga (IP-tala skráð) 20.4.2008 kl. 00:37]

Hahahah... já alveg rétt, þessu var ég búin að gleyma.  Alltaf vorum við jafn svekktar að verða ekki hásar eftir öskrin :)  Þetta var bara snilld!

Ég var nú reyna að muna textan er við sömdum við smjattpattalagið...  "Jóna jarðaber og Solla sítróna, Kalli kartafla... " svo man ég því miður ekki meir :( 

[Lauga (IP-tala skráð) 20.4.2008 kl. 00:45]

Smá leiðrétting.  Þetta var nú ekki alveg rétt hjá mér í fyrri athugasemdinni ... því málið var að ég og Helga sömdum lag um Smjattpattana, en því miður er ég búin að gleyma textanum að mestu leyti ... en man þó "Jóna jarðarber og Solla sítróna, Kalli kartafla ... ".  Annað hefur gleymst :(