Meiðsli og teygjur

Eins og áður hefur komið fram á þessari síðu er Múrenan fótboltaþjálfari og núna í morgun var hún mætt með sína menn í Gladesville Ryde Magic (GRM) á Fraser Park í Marrickville og mótherjarnir ekki af verri endanum en það voru að sjálfsögðu hinir rauðgrænklæddu liðsmenn Fraser Park.

Þrátt fyrir nokkuð góða spilamennsku leikmanna GRM í leiknum, þá sérstaklega síðustu 20 mínúturnar í fyrri hálfleik, tapaðist leikurinn 0-3.  Tvö mörkin verða að skrifast að miklu leyti á stærð markvarðar GRM, sem er ekki nægjanleg enn sem komið er, en í báðum tilfellum fór skotið einfaldlega yfir þann ágæta herramann.

Það sem vakti furðu Múrenunnar í leiknum og fyrir leikinn, var hversu mikið var um meiðsli meðal leikmanna GRM, en þess má geta að þeir eru 14 ára gamlir.  Af þeim 15 sem tóku þátt í leiknum í dag, voru 6 tognaðir, ýmist í baki, lærum eða ökklum.
Greinilegt er að aðalþjálfari liðsins hefur ekki lagt nægjanlega mikið upp úr teygjum, meðan Múrenan var fjarverandi, þrátt fyrir ítrekaðar beiðnir um það af hálfu Múrenunnar.  Þar að auki hafa fyrrum þjálfarar þessara drengja sem leika undir merkjum GRM, ekki lagt neina áherslu á teygjur því sumir piltanna geta varla teygt fingur sína niður á hné, ef fætur þeirra eru beinir.

Vöðvastyttingar í lærum, rassi og baki eru því greinilegar og mikið ójafnvægi í styrk milli vöðvahópa.  Auk þess eru strákarnir náttúrulega á gríðarlegu vaxtarskeiði, sem gerir teygjur enn mikilvægari en ella.  Múrenunni þykir því blasa við að töluverða vinnu verði að leggja í teygjur á næstu vikum og mánuðum.

 

Athugasemdir

[þóra (IP-tala skráð) 17.2.2008 kl. 19:01]

Nú þú ert sem sagt komin heim. Jæja gott að heyra. Bið að heilsa.

kv. Þóra

[hetjan unga (IP-tala skráð) 19.2.2008 kl. 18:14]

þarf maður að byrja á því að höggva niður eitt stykki risafuru tilað geta teygt á innanverðu lærinu? en svo þarf tréð að vera enn á lífi tilað hjálpa til við teygjur á kálfavöðvum, djúplægari kálfavöðvum og framanverðum lærvöðvum. þetta þykir mér undarlegt.

[Halldór (IP-tala skráð) 23.2.2008 kl. 04:05]

Hetjan unga misskilur því það er ekkert að marka myndaröðina. Fyrst er teygt á kálfum og framanverðum lærum og svo er risafuran hoggin. Eftir þreytandi smíðavinnu (staur, grindverk og bekkur) er teygt duglega á hálsi, brjósti og mjöðm. Innanverð læri eru tekin fyrir síðast en þá er stubburinn algerlega nauðsynlegur. Þetta eru dæmigerðar ´kolefnisjöfnunarteygjur´ því að sjálfsögðu er önnur risafura gróðursett í staðinn.

Ljótt að heyra þetta með strákana. Þeir þurfa þó ekki að hafa áhyggjur því eftir nokkurra vikna leiðsögn Múrenunnar verða þeir orðnir liðugri en fimleikastelpurnar í Gerplu.

[Páll Jakob Líndal, 25.2.2008 kl. 01:43]

Þetta er nokkuð rétt hjá Halldóri, fyrst teygt á lærum og kálfum, svo er risafuran felld, og eftir það teygir maður innan á lærinu.  Svo er önnur risafura gróðursett en úr hinni föllnu furu er smíðað hlið og þegar það er búið er teygt hressilega á náranum.  Að því loknu ætti risafuan sem gróðursett var, að vera orðin nægjanlega stór svo hægt sé að nota hana til stuðnings þegar teygt er á djúplægum kálfavöðvum og framan á lærum.  Risafuran er svo felld aftur að mestu leyti, aðeins þannig að örmjó spíra standi eftir, og hún er notuð þegar teygja þarf á brjóstvöðvum, þá er mjóbakið tekið fyrir og rassinn.  Að lokum er bekkur smíðaður úr þeim hluta furunnar sem var felldur og bekkurinn notaður til að auðvelda hálsteygjur.  Ný risafura er svo gróðursett ...  

[Halldór (IP-tala skráð) 26.2.2008 kl. 06:16]

Einmitt! Helstu mistökin eru að halda hverri teygju í of stuttan tíma. Mjög gott að miða t.d. við vöxt risafura eins og í þessu tilfelli.