Til Reykjavíkur

Jæja, nú er Múrenan komin í bæinn ... það er til Reykjavíkur.  Mjög góðri og árangursríkri dvöl á Djúpavogi er lokið, í bili að minnsta kosti.

Andrés oddviti og kona hans Gréta keyrðu Múrenuna í flug á Egilsstöðum í gærkvöldi.  Öxi var kolófær, Breiðdalsheiði illfær en fjarðaleiðin fær ... Djúpivogur, Breiðdalsvík, Stöðvarfjörður, Fáskrúðsfjörður, Reyðarfjörður, Fagridalur og Egilsstaðir ... 150 km ... 300 km fram og til baka ... eins og frá Reykjavík til Blönduóss.  Hálka og snjór var á veginum alla leiðina, og meðalhraði var því um 70 km/klst ... þetta var margra klukkutíma ferðalag fyrir þau, Andrés og Grétu.  Það er því óhætt að segja að þjónustan við landsmenn sé ærið misjöfn.  Til dæmis tekur það Múrenuna aðeins 5 mínútur, að hámarki, að keyra heiman að frá sér og út á Reykjavíkurflugvöll.

En að öðru ...

Í kvöld blasir við Múrenunni að fara á matarhátíð KISS-klúbbsins ... sem um þessar mundir fagnar 10 ára afmæli sínu.  Þar að auki berast góðar fréttir frá herbúðum meistaranna, þ.e. KISS, því skipulagðir hafa verið tónleikar í ACER Arena í Sydney þann 20. mars nk.  Ekki slæmt það!!!
Fyrir þá sem hafa áhuga á því, þá hét ACER Arena áður Sydney Superdome og er næsta hús við hinn sívinsæla Ólympíuleikvang.  Sagt er að 21.000 tónleikagestir komist fyrir í höllinni samtímis og nú verður spennandi að sjá hvort ekki tekst að fylla húsið umrætt kvöld.

Múrenan verður á staðnum ... svo mikið er víst!!!

Það var gaman að heyra í 11-fréttum RÚV að nafni Múrenunnar Páll H. Guðlaugsson hefur tekið að sér að þjálfa Leikni Fáskrúðsfirði í 3. deildinni.  Múrenan andar léttar enda hafa þjálfaramál Leiknis líklega verið í uppnámi um talsvert skeið.  Gott að RÚV kom þessu að í fréttatímanum og sérstaklega var það fagnaðarefni að fréttin af Leikni kom á undan þeirri sem fjallaði um að íslenskur kvenkyns badmintonspilari hefði komist í aðra umferð sænska meistaramótsins ...

Múrenan óskar svo Binga velfarnaðar í nýju starfi ... og vitnar í ofnotaðan frasa íþróttafréttamanna síðastliðna viku eftir hrakfarir íslenska landsliðsins ... "það verður gott að spyrna sér frá botninum"!!  Handboltalandsliðið spyrnti sér vel frá botninum í gærkvöldi og kannski gerði Bingi það líka í gærkvöldi ... hver veit??  Svo mikið er víst að Múrenan öfundar hvorki liðsmenn handboltalandsliðsins né Binga þessa dagana ...

Athugasemdir

[Halldór (IP-tala skráð) 27.1.2008 kl. 18:37]

Að sjálfsögðu var ráðning Páls H. Guðlaugssonar fyrsta frétt á RÚV! Ég (eins og örugglega flestir landsmenn) er búinn að vera í lausu lofti undanfarnar vikur vegna þjálfaramála Leiknis á Fáskrúðsfirði. Ég hef tröllatrú á gömlu kempunni og er sannfærður um að stjórn Leiknis gerði rétt með þessari ráðningu. Hann er ekki ódýr en hann mun reynast ómetanlegur í baráttunni í þessari erfiðu deild.....