Stemmning í Álafosskvos

Í gær gerði ég mér ferð í Mosfellsbæ, nánar tiltekið í Álafosskvosina, til að kynna mér betur framkvæmdir við tengiveg frá Álafosskvosinni að fyrirhuguðu íbúðarhverfi í Helgafellslandi, sem þar eru í fullum gangi.  Eftir að hafa horft á framkvæmdarsvæðið í dágóða stund frá ýmsum hliðum get ég vel skilið örvæntingu þeirra sem vilja vernda vilja kvosina.  Svæðið þolir engan veginn þessa braut og það sem meira er, þetta svæði og áfram upp með Varmánni, er eitt mest sjarmerandi svæði á höfuðborgarsvæðinu.  Gömlu byggingarnar, áin, skógurinn og kvosin - stemmningin sem maður upplifir þarna er alveg rosalega skemmtileg - maður fer á svolítið tímaflakk.  Þarna eru því virkilega fín tækifæri fyrir Mosfellsbæ að byggja upp eitthvað mjög sérstakt ... en nei, setjum tengibrautina þarna, það er ódýrasta, hagkvæmasta og stysta leiðin.

Formaður skipulags- og byggingarnefndar Mosfellsbæjar segir í Morgunblaðinu í dag að núverandi lega tengibrautarinnar sé besta leiðin.  Allar leiðir inn í hverfið hafa verið skoðaðar ítarlega af fagfólki og niðurstaðan er að þetta er besta lausnin ... Ég er sammála!!  Þó undir þeim formerkjum að ég gleymi sögunni, náttúrunni, menningarminjunum, stemmningunni, griðastaðnum, umferðargnýnum, sjónrænni mengun, loftmengun, hugmyndum um að hlúa að litlum framleiðendum, árniðnum o.s.frv.  Að teknu tilliti til þessara atriða ... þá er ég algjörlega ósammála!!!  Ég þykist nokkuð viss um að fagfólkið sem vann þessa vinnu gerði það vel ... en var talað við allt það fagfólk sem hefði ef til vill þurft að tala við?  Var kynnt fyrir skipulags- og byggingarnefnd álit sálfræðinga sem hafa skoðað áhrif umhverfis á líðan fólks?  Var blaðað í einhverjum rannsóknarniðurstöðum um þetta efni?  Hvert var aftur álit félagsfræðinganna? Listamannanna?  Hvers virði er eitthvað sem kalla má "sérstök stemmning" - þokukennt hugtak, ekki satt?  Allir finna samt fyrir henni. Stemmningin hefur orðið til á löngum tíma - núna skal henni fórnað.  Hvað myndu menn segja ef stemmningin bankaði upp á dyrnar hjá bæjarstjórninni í Mosfellsbæ með reikning.  Hún er létt á fóðrum og tekur aðeins 1000 kr. á tímann en vinnur 24 tíma á dag, alla daga ársins.  Hún er líka rausnarleg að því leyti að henni finnst sanngjarnt að miða upphaf sitt við það þegar Björn Þorláksson hóf ullarvinnslu á svæðinu árið 1896 eða fyrir 111 árum.  Reikningurinn hljóðar upp á 972.360.000.-  

Ég hef ekki hugmynd um hvernig á að leysa þetta mál, en að fórna menningarminjum, stemmningu sem á sér fáar hliðstæður á Íslandi og fallegri náttúruperlu, sem er þó manngerð að hluta fyrir tengibraut fyrir íbúa 1000 íbúða, er skammsýni. 

Athugasemdir

[Dóri (IP-tala skráð) 12.2.2007 kl. 19:11]

Helstu kostirnir við að flytja í nýja hverfið eru tíundaðir á heimasíðu fyrirtækisins Helgafellsbyggingar (Helgafell.is), sem sér um uppbyggingu svæðisins. Þar má m.a. sjá:

"Álafosskvosin er einstakt svæði á Íslandi. Þar er nú litrík listamannanýlenda þar sem verksmiðjur gamla ullarveldisins á bökkum Varmár hafa öðlast nýtt líf sem vinnuaðstaða fjölbreytts hóp lista- og handverksmanna auk þess sem hljóðver hljómsveitarinnar Sigurrósar er þar í kvosinni."

"Nokkurra mínútna gangur í litríka listamannanýlendu í einstöku umhverfi í Álafosskvosinni."

"Lítil bílaumferð verður á svæðinu og lágur umferðarhraði."

Það er eitthvað við þetta allt saman sem passar ekki alveg......