Hvað er þetta "murenan"?

Árið er 1999, heimurinn skelfur vegna yfirvofandi 2000-vanda en starfsmenn Tilraunastöðvarinnar á Keldum reyna að láta ógnina ekki ná tökum á sér.  Ég, sem þá telst til starfsmanna Tilraunastöðvarinnar, sit fyrir framan Macintosh-tölvuna í tölvu- og lesherberginu í Húsi 3.  Mitt verkefni þá stundina var að gerast fullgildur meðlimur þess hóps fólks sem notar vefsíðuna hotmail.com til að eiga samskipti við annað fólk.  Í PC-tölvunni skammt frá mér situr Doddi snöggi og leggur kapal, ekki svo að skilja að Doddi hafi stundað þá iðju mikið - þvert á móti.  Við hlið hans situr enn einn starfsmaður Tilraunastöðvarinnar, gengur undir gælunafninu Benný.  Hún spáir í hvaða möguleikar eru fyrir hendi í kaplium hjá Dodda. 

Ég ríf rafmagnaða þögnina ... 

"Nú er ég að stofna svona hotmail eða hvað þetta nú heitir ... hvaða notendanafn á ég eiginlega að nota?"  Aftur þagnar allt.  "Múrenan" segir Benný í tón þess sem bæði valdið og vitið hefur.  Ég gríp það á lofti.  Múrenan.  Það er gott nafn - [e-mail].  Þetta lúkkar líka bara nokkuð vel. 

Með tímanum fer nýtt vandamál að knýja dyra.  Spurt er: "Ertu með netfang?" "Já, já [e-mail]" "Ha?!?  Hvað segirðu, mu- ... hvað?" "[e-mail]" "Murenan?!?" "Já, m-u-r-e-n-a-n- at hotmail-. - com."  Þá kemur spurningin:  "Hvað er þetta murenan?" "Það er í rauninni Múrenan ... það er sko ránfiskur!  Annars er þetta tekið úr Sval og Val ... Múrenan er dulnefni á bófa sem heitir Jón Harkan."  "Já, já svoleiðis ... "  Málið dautt ... viðkomandi hefur aldrei lesið Sval og Val!

Þetta er nú sagan á bak við [e-mail].  Núna hefur [e-mail] bæst í hópinn og murenan.blog.is, þannig að Múrenan er hvergi hætt!!

Að lokum get ég ekki stillt mig um að taka klausu upp úr 17. hefti Svals og Vals "Svamlað í söltum sjó" eftir snillinginn Franquin í þýðingu Bjarna Fr. Karlssonar, þar sem Jón Harkan "Múrenan" kynnir sig fyrir Sval (kynningin á sér stað á 200 metra dýpi í flakinu af Sædrottingunni):

"Veistu hvað Múrena er? Það er stór fiskur með hvassar tennur ... hún heldur sig í klettasprungum og ræðst sjaldan á kafara ... en komi einhver hálfviti sem rekur lúkuna inn til Múrenunnar ... þá ræðst hún á hann ... og drepur hann jafnvel.  Ég er Múrenan ... og þú varst svo vitlaus að raska ró Múrenunnar ... " (bls 49 - 50).  Svo mörg voru þau orð ...

Ég ætla aðeins að sjá til hvort ég geri þessi orð Jóns Harkans að mínum! 

Athugasemdir

[Dóri (IP-tala skráð) 9.2.2007 kl. 09:58]

Þannig að Benný ber ábyrgðina! En hvernig í ósköpunum datt henni þetta í hug?? Hvort var hún að hugsa um ránfiskinn eða Jón Harkan í vinnunni á Keldum?

Svalur og Valur, Tinni, Lukku Láki.....allt heimsklassa bókmenntir.

 Kv. Dóri 

[Benný (IP-tala skráð) 9.2.2007 kl. 13:38]

Já ég skal varpa ljósi á þetta mál :) Man nú kannski ekki hvernig þetta byrjaði en á þessum tíma átti ég svakalega flottan Dihatsu Sirion með númerinu ZG-908 og fékk bíllinn þá að sjálfsögðu nafnið Zorglúbb (augljóst ekki satt), sem allir vita að er vondi karlinn í Sval og Val (Bobbi getur kannski komið með góða klausu um það fljótlega). Hvort það kom á undan eða eftir man ég ekki alveg en sumir fóru að nota orðið múrenan sem gælunafn á sjálfan sig....  Sem ég sit svo og er að skipta mér af kaplinum þarna um árið (var nú örugglega að spekúlera í einhverju gáfulegra en allavega....Þessari hotmail spurningu er kastað fram og liggur þá ekki svarið í augum uppi??  ég bara spyr.....og svara Jú!!  Kveðja, Z (Z fyrir Zorglúbb)

[Dóri (IP-tala skráð) 9.2.2007 kl. 16:14]

Takk kærlega fyrir þetta Benný. Nú get ég loksins hætt að velta þessu fyrir mér (Benný...múrenan...ránfiskur...Jón Harkan...kapall...Keldur...hugsa...Bobbi...hotmail...ha??) en það kemur ekki á óvart að sjálfur Zorglúbb hafði áhrif, sá ótrúlegi snillingur!

[Benný (IP-tala skráð) 10.2.2007 kl. 00:17]

já ég veit þetta er augljóst!!  En það er náttúrulega alveg nauðsynlegt fyrir alla að hafa gælunafn úr Sval og Val, ekki spurning, Dóri ég mana þig til að fletta í gegnum bækurnar finna þér nafn!!

[Dóri (IP-tala skráð) 12.2.2007 kl. 18:44]

Auðvitað, þetta flokkast undir vítavert kæruleysi! Ég vel það sem kemur fyrst upp í hugann og lýsir mér best: Sveppagr...... nei annars....Gormur!