Sunnudagur 23. maí 2010

Vorum í þessari líka góðu brúðkaupsveislu í gærkvöldi.  

Karvel og Arna að giftast.

 

Fullt hús af skemmtilegu fólki, sungið, hlegið og skemmt sér. 

Ekki spillti grillað íslenskt lambalæri fyrir ... ;)

--- 

Guðrún sullaði niður nokkrum dropum af mjólk á stofuborðið í kaffitímanum.

Hún var beðin um að sækja tusku til að þurrka.

Það var auðsótt mál ... skrapp fram á baðherbergi og í óhreinatauskörfuna.  Kom þaðan sigri hrósandi með hvítan sokk í höndinni, gekk að borðinu og þurrkaði samviskusamlega dropana.

Svo var sokknum skilað samviskusamlega í körfuna aftur.

--- 

Skrapp í dásamlegan fótbolta í dag ... í góðri rigningu, svölu veðri og dálítið hvössu.

Sydney-veður síðustu daga á undanhaldi og hreinræktað íslenskt veður tekið við. 

---

Gjörningur minn í dag fólst í því að horfa á Næturvaktina.

Það hljómar örugglega skringilega í eyrum margra að við Lauga höfðum fyrir kvöldið í kvöld ekki séð einn einasta þátt af Næturvaktinni.

Ég ákvað því að í dag myndi ég gera eitthvað nýtt, sem ég hefði aldrei gert áður ... og það var að horfa á Næturvaktina.  Ég var ekki svikinn ... stórkostlegir þættir ...

Lauga ákvað hinsvegar að baka skúffuköku algjörlega frá grunni.  Það hefur hún aldrei gert fyrr að eigin sögn. 

---

Hér er Sydney Houdini í veislunni í gær ... á Bobby Car, hvorki meira né minna!

 

Athugasemdir

[Stjóri (IP-tala skráð) 24.5.2010 kl. 01:10]

Sokkur eða tuska...skiptir ekki máli  Mér líst betur á gjörninginn í dag (hvernig datt þér annars í hug að drekka mjólk úr plastpoka?? :) enda Næturvaktin frábær. Þið eruð heppin að eiga Dagvaktina og Fangavaktina eftir því þessar seríur eru hverjar annarri betri. Leikararnir fara á kostum, og þá ekki síst væntanlegur borgarstjóri í Reykjavík!  

[Páll Jakob Líndal, 24.5.2010 kl. 07:41]

Það er von að spurt sé um gjörninginn að drekka mjólk úr plastpoka. Ég veit ekki af hverju mér datt það í hug ... en að fenginni reynslu þá mæli ég ekkert sérstaklega með því. Alveg tvímælalaust betra að drekka úr bolla eða glasi, nú eða skál jafnvel.